Sunday, July 27, 2008

အာရှ- ပစိဖိတ် ကလေးသူငယ် တွေ့ဆုံပွဲ က ပေးတဲ့ အသီးအပွင့်များ


ဂျပန်နိုင်ငံဟာ အာရှမှာ ပညာရေးနဲ့ ပတ်သက်ရင် အမျိုးသား စီမံကိန်းကို နှစ်ရှည် ကြိုတင် စီစဉ် အကွက်ချ စီမံ လေ့ ရှိတာ နာမည်ကြီးပါ။ ဘာသယံဇာတမှ မထွက်တဲ့ ဂျပန် နိုင်ငံ ဖွံ့ဖြိုး တိုးတက်ရေး နဲ့ စီးပွားရေး ခိုင်မာမှု အတွက် အဓိက လိုအပ်ချက် ဖြစ်တဲ့ လူသား အရင်းအမြစ် ဖွံ့ဖြိုး တိုးတက်ရေး အတွက် အဓိက သော့ချက် ဟာ တိုင်းပြည်ရဲ့ ပညာရေးပါ။ ဒါကြောင့် လာမယ့် အနှစ် ၃၀မှာ ဖြစ်နိုင်မယ့် လိုအပ်မယ့် ပညာရေး စီမံကိန်းကို ကြိုတင် ပြင်ဆင် ရေးဆွဲလေ့ ရှိပါတယ်။ ဘယ်အချက်တွေပေါ် အခြေခံ ရေးဆွဲ ပါသလဲ။ ကြေညာတဲ့ အချက်နဲ့ မကြေညာ တဲ့ အချက် တို့ ရှိနိုင်တဲ့ အနက် ကျွန်မကတော့ လုပ်ဆောင်ချက်ကို အခြေခံ ပြီး စိတ်စေတနာကို ပြန်မှန်း တတ်တဲ့ အကျင့် ရှိတဲ့ အတိုင်း ကိုယ်ရှာတဲ့ အချက်တွေ ထဲက မြင်မိတဲ့ အချက် တစ်ခု ကတော့ အာရှ-ပစိဖိတ် ကလေး သူငယ် တွေ့ဆုံပွဲ လေးက ပေးတဲ့ အချက်ပဲ ဖြစ်ပါတယ်။

အာရှ- ပစိဖိတ် ကလေးသူငယ် တွေ့ဆုံပွဲ ဆိုတာကို ဂျပန် နိုင်ငံ ဖူကူအိုကာ မြို့မှာ နှစ်စဉ် ကျင်းပလေ့ ရှိပါ တယ်။ ဖူကူအိုကာမြို့ နှစ်တစ်ရာပြည့် အထိမ်းအမှတ် အဖြစ် ၁၉၈၉ ခုနှစ်က စတင် ကျင်းပတာ ဖြစ်ပြီး ဒီလ ဇူလိုင်လ ၉ရက်ကနေ ၂၄ရက်နေ့ အထိ ကတော့ ဒီပွဲ ကျင်းပခဲ့တာ အနှစ် ၂၀ပြည့် အဖြစ် ကျင်းပတာ ဖြစ်ပါတယ်။ ဒီပွဲကို အာရှနဲ့ ပစိဖိတ် ဒေသက နိုင်ငံပေါင်း ၄၀ ကျော်က ကလေး သူငယ်များ တက်ရောက်ဖို့ ဖိတ်ကြား ခံရပြီး ဒေသတွင်းက အသက် ဆယ်နှစ်က ဆယ့်တစ်နှစ်ကြား ကလေးပေါင်း ၃၀၀ ကျော် နှစ်စဉ် တက်ရောက် လေ့ ရှိပါတယ်။

ပြိုင်ပွဲ ကျင်းပ ရတဲ့ ရည်ရွယ်ချက် ကိုတော့ ကမ္ဘာ့ ငြိမ်းချမ်းရေးကို ရှေးရှုပြီး ကမ္ဘာသူ ကမ္ဘာသား အားလုံး နိုင်ငံ နယ်နမိတ် စည်းမျဉ်း များကို ကျော်လွန်လို့ လူမျိုး၊ ဘာသာ၊ ကျား/မ မရွေး ခံယူချက်၊ ယဉ်ကျေးမှု၊ အစဉ် အလာ များ မတူညီ သော်လည်း ယဉ်ကျေးမှု အစဉ်အလာချင်း ဖလှယ်ပြီး အချင်းချင်း လေးစား နားလည် နိုင် ကြ စေဖို့၊ ဒီလို လေးစား နားလည်မှုကို အခြေခံပြီး ငြိမ်းချမ်းရေးကို တည်ဆောက်ဖို့ ရည်ရွယ်တယ်လို့ ဆိုပါ တယ်။ အစီအစဉ် များကိုလည်း ဒီ ရည်ရွယ်ချက် အတိုင်း ဖော်ဆောင် နိုင်ဖို့ စီစဉ် တင်ဆက် ထားပါတယ်။

ဒါ့အပြင် ဒီပွဲကို တက် ရောက်တဲ့ ကလေးငယ် များဟာ ကိုယ့်ခြေထောက်ပေါ် ကိုယ်ရပ်နိုင် လောက်အောင် တော်တဲ့ လူကောင်း လေး တွေ ဖြစ်ဖို့ လိုပါတယ်။ ကလေး တိုင်းဟာ သက်ဆိုင်ရာ နိုင်ငံများကို ကိုယ်စား ပြုပြီး တက်ရောက် နိုင်ဖို့ လျှောက်လွှာ တင်ရတာ ဖြစ်ပြီး အဲဒီ လျှောက်လွှာ ထဲမှာ တက်ရောက် ချင်ရတဲ့ အကြောင်း ရင်းကို ထိမိ ကျစ်လျစ် ကောင်းမွန်စွာ စာစီကုံး ရေးသား တင်ပြ ရမှာ ဖြစ်ပြီး အဲဒီ ကလေးတွေဟာ ဂျပန် နိုင်ငံ ကို ရောက်တဲ့ အခါ ဂျပန် မိသားစု တစ်စုချင်းရဲ့ အိမ်မှာ ဂျပန် လူမျိုး ခေတ္တ အုပ်ထိန်းသူ များနဲ့ အတူ နေထိုင် ရပြီး ဂျပန် ရိုးရာ ယဉ်ကျေးမှု အစဉ် အလာ များကိုသာ မက ဒေသတွင်း နိုင်ငံ အသီးသီးက ကိုယ်စားလှယ် ကလေးငယ် များရဲ့ သက်ဆိုင်ရာ နိုင်ငံအလိုက် ရိုးရာ အစဉ်အလာနဲ့ ယဉ်ကျေးမှု များကို လေ့လာ ဖလှယ် ရမှာ ဖြစ်ပါတယ်။

ဒီလို ဖြစ်ဖို့ အရည်အချင်း ရှိသူများကိုချည့် စုစည်း ရွေးချယ် ဖိတ်ခေါ် ခဲ့တဲ့ ဂျပန် နိုင်ငံကတော့ နှစ်စဉ် ဒေသ တွင်းက ကလေး တွေရဲ့ အရည်အချင်း တွေကို သူတို့ ရွေးချယ် ထားတဲ့ ကလေး လက်ခံသူ ခေတ္တ အုပ်ထိန်း သူ ဂျပန် မိသားစု ဆိုတာတွေ ကနေ အနီးကပ် စောင့်ကြပ် နေပြီး ကိုယ်စားပြု ထင်ဟပ် လာမယ့် သက်ဆိုင်ရာ နိုင်ငံက ကလေး တွေရဲ့ အရည်အချင်းကို မှန်းဆ နိုင်ပါတယ်။ ဒါတွေကို စစ်တမ်း ကောက်ပြီး ပညာရေးနဲ့ လူ့စွမ်းအား အရင်းအမြစ် ဖွံ့ဖြိုးမှု စီမံကိန်း တွေထဲမှာ ထည့်သွင်း စဉ်းစား ပါတော့တယ်။
ကလေးသူငယ်များကို စေလွှတ်တဲ့ ဒေသတွင်း နိုင်ငံများ အဖို့လဲ ကိုယ့်နိုင်ငံက ကလေးတစ်ယောက်ချင်းက ဒီလို ပွဲမျိုးကို တက်ရောက် နိုင်ဖို့ နိုင်ငံ ကိုယ်စားပြု ရွေးချယ် ခံရဖို့ အတွက် အားသွန်ခွန်စိုက် ကြိုးပမ်း ကြတဲ့ အတွက် ကလေး သူငယ်များ ကိုယ်ရည် ကိုယ်သွေး တိုးတက် မြင့်မား လာစေဖို့ ကြိုးစား ချင်လာအောင် ဆွဲဆောင် နိုင်ခဲ့ ပါတယ်။ ဒါကြောင့် ဒီပွဲကို အရင်းပြုပြီး ဂျပန် နိုင်ငံလောက် အမြတ် မထွက် ပေမယ့် နိုင်ငံ အသီးသီးက လူ့စွမ်းအား အရင်းအမြစ် ဖွံ့ဖြိုးရေး အတွက်တော့ အကျိုး အများကြီး ရှိနေ ပါသေးတယ်။
ဒါပေမယ့် ဒေသတွင်း နိုင်ငံ တစ်ခုက ဖြစ်ရပ်ကတော့ ရင်နင့်စရာ ကောင်းလွန်းလှ ပါတယ်။ အရင်က အတန်း တိုင်းမှာ ဘာသာရပ် တိုင်းမှာ အမှတ်ပြည့် ရအောင် တော်တဲ့၊ ပန်းချီ၊ နိုင်ငံခြား ဘာသာစကား လေ့လာမှု တို့မှာ ကလေး အရွယ်နဲ့ မလိုက် လောက်အောင် ထက်မြက် ထူးချွန်တဲ့ ကလေးမ လေး တစ်ယောက်ဟာ အဲဒီပွဲကို တက်ရောက်ဖို့ မြို့နယ် အဆင့်မှာ ရွေးချယ် ခံရပြီး နောက်ဆုံး ဖိုင်နယ် ပွဲစဉ်မှာ အရွေးချယ် မခံရဘဲ ရှုံးနိမ့် ခဲ့ဖူး ပါတယ်။ ဒီကလေးမ လေးဟာ နောင်အခါ ယဉ်ယဉ် ကလေးနဲ့ ဆိုးသွမ်းတဲ့ လူငယ် ဖြစ်လာခဲ့ပြီး လက်တစ်လုံး ခြား လှည့်ပတ်တဲ့ နေရာမှာ၊ လက်ကြော တင်းအောင် ကြိုးစား ချင်စိတ် ပျောက်ပြီး ဖြတ်စား လျှပ်စား လူပေါ် လူဇော် လုပ်တတ်တဲ့ နေရာမှာ၊ သူတပါးကို ညာပြီး ခိုင်းစားတဲ့ နေရာမှာ တဖက်ကမ်းခတ် ထူးချွန် လာခဲ့ ပါတယ်။ သူမနဲ့ စကားပြောခွင့် ရတဲ့ အချိန်မှာ သူမရဲ့ စကား တစ်ခွန်းက ကျွန်မကို ရင်နင့် စေပါတယ်။

ဖိုင်နယ်ပွဲမှာ သမီး အကောင်းဆုံး ကြိုးစားခဲ့ ပါတယ်။ ပြိုင်ပွဲ ၀င်သူ ၃၇ယောက် ထဲမှာ ၃၅ယောက်ပဲ တကယ် လာပြိုင် ခဲ့ကြတယ်။ ဒါပေမယ့် လူရွေးပွဲကို လာကို မပြိုင်တဲ့ အသက် ဆယ့် သုံးနှစ် သမီး အာဏာပိုင် လူကြီး တစ်ယောက်ရဲ့ တူမက ရွေး ချယ် ခံရပြီး ဂျပန် နိုင်ငံက ပွဲကို တက်ခွင့် ရခဲ့တယ်။ ကျောင်းက သမီးရဲ့ ပြိုင်ဘက် တွေက သမီးကို ဂျပန်ပြုတ် လို့ လှောင်ပြောင် ရယ်မော ခဲ့ကြတယ်။ သမီးရဲ့ အပြစ်၊ ချို့ယွင်းချက် တစုံတရာ မပါဘဲ လူကြီး တွေရဲ့ ဇာတ် လမ်းဆင် ထားမှု အကွက် တစ်ခုကြောင့် သမီး ကျောင်းပြောင်း ပြေးခဲ့ ရတယ်။ သမီးရဲ့ ရိုးသား ဖြူစင်စွာ သန့် သန့် ရှင်းရှင်း နေထိုင် ကြိုးစားမှုဟာ ကလိမ်ကကျစ် သမားတွေရဲ့ အသုံး ချစရာ ဖြစ်ခဲ့ ပြီးမှတော့ သမီးက ဘာလို့ ထပ်ပြီး အသုံးချ ခံရဦး မှာလဲ… ကိုယ့် ကြိုးစားမှုရဲ့ အသီးအပွင့်ကို ကိုယ်တိုင် ခံစားခွင့် မရှိ ဘဲနဲ့တော့ ဘာအတွက် ကြိုးစား နေရ ဦးမှာလဲ.. သူတို့တွေတောင် သူတပါးကို ခေါင်းပုံဖြတ် အညွန့်ခူး စားသေးတာ သမီးက ဒါကို ခေါင်းငုံ့ခံ ပေးဆပ် နေရဦး မှာလား…တဲ့။

ကျွန်မနဲ့ စကားပြောခွင့် မရပေမယ့် အဲဒီ ပြိုင်ပွဲနဲ့ ပတ်သက်ပြီး ပါဝင်ခဲ့တဲ့ တခြား ကလေးငယ် တွေလဲ သူမလို ဖြစ်လာ ခဲ့ကြတယ်။ အာရှ- ပစိဖိတ် ဒေသတွင်း ကလေးသူငယ် တွေ့ဆုံပွဲတဲ့.. ရည်ရွယ်ချက်လေးတွေ သိပ် ကောင်း ပါတယ်။ ဒါပေမယ့် ဒီပွဲလေး တစ်ခု ပါပဲ။ ဂျပန် နိုင်ငံက အမြတ် များစွာ ရခဲ့တယ်။ ဒီပွဲလေး တစ်ခုပါပဲ။ အာရှ- ပစိဖိတ် ဒေသတွင်း နိုင်ငံ အများစုက ကလေးငယ်တွေ အကျိုးအမြတ် များစွာ ရခဲ့တယ်။ ဒီပွဲလေး တစ်ခု ပါပဲ။ ဒေသ တွင်း နိုင်ငံ တစ်ခုက ကလေးငယ်တွေ တရား မျှတမှုကို အယုံ အကြည် မရှိတော့ဘူး။ ရိုးသား ကြိုး စား မှုကို အားနည်းချက် အဖြစ် မြင်သွား ခဲ့ကြတယ်။ ဖြတ်စား လျှပ်စား ကလိမ် ကကျစ် ကြီးနိုင် ငယ်ညှင်း လျှင်သူ စားစတမ်း အလွဲ သုံးစား လုပ်တတ်မှု တွေကို မထင်မှတ်ဘဲ သင်ယူ မိသွား ကြတယ်။ ကလေးငယ် သန်းပေါင်း များစွာရဲ့ စိတ်ဓာတ်နဲ့ ကိုယ်ကျင့် တရားတွေ အဆိပ်သင့် ပျက်စီး ခဲ့ကြတယ်။ အဲဒီ နိုင်ငံမှာ အဲလို ပွဲပေါင်း များစွာကို အဲလို ပုံစံနဲ့ အနှစ်နှစ် အလလ ကျင်းပ ခဲ့ကြတယ်။ ကလေးသူငယ်တွေ၊ လူငယ် ယောက်ျား၊ မိန်းမပေါင်း များစွာကို စိတ်ဓာတ် နဲ့ အကျင့် စာရိတ္တ ရေးရာကို ရစရာ မကျန်အောင် ပျက်စီး စေခဲ့တယ်။ ဘ၀ ပေါင်း များစွာ ပျက်စီး ခဲ့ကြတယ်။ အဲလို နိုင်ငံသားများနဲ့ စုစည်း ထားတဲ့ နိုင်ငံ တစ်နိုင်ငံ အရှေ့တောင် အာရှ မှာ ပေါ်ထွန်း ခဲ့ပြီး ဒေသတွင်းမှာ ပြဿနာ အပေးဆုံး နိုင်ငံ အဖြစ် နှာခေါင်းရှုံ့ ခံခဲ့ရ၊ ခံရဆဲ ဖြစ်နေ ခဲ့တယ်။
လူမျိုးတုံး သတ်ဖြတ်မှု လို့ ဘာသာပြန် ခေါ်ဆိုတဲ့ genocide ကို ဒီလို အဓိပ္ပာယ် ဖွင့်ဆို ထားပါတယ်။ လူသား မျိုးနွယ် တစ်ရပ်လုံး၊ လူမျိုးစု တစ်ခုလုံး၊ မျိုးဆက် တစ်ဆက်လုံး မျိုးတုံးအောင် သတ်ဖြတ်မှု သို့မဟုတ် အဆိုပါ လူမျိုးစု၊ မျိုးဆက် တစ်ခုလုံးရဲ့ ဘာသာရေး၊ ယဉ်ကျေးမှု၊ အစဉ်အလာ တို့ကို ပျက်ပြားအောင် လုပ်ဆောင်မှု၊ သို့မဟုတ် အဆိုပါ လူမျိုးစု၊ မျိုးဆက် တစ်ခုလုံးရဲ့ စိတ်ဓာတ်ရေးရာ နဲ့ ကိုယ်ကျင့် တရား တို့ကို ပျက်ပြား အောင် ရည်ရွယ်ချက် ရှိရှိ တမင်သက်သက် လုပ်ဆောင် မှုကို လူမျိုးတုံး သတ်ဖြတ်မှု လို့ ခေါ်ဆိုသည် တဲ့။

အဲလို အဖြစ်အပျက် မျိုးတွေကို ကျွန်မတို့ မျိုးဆက် တွေက မသိလိုက်ဘဲ လိုက်နာ သင်ယူ လက်ဆင့်ကမ်း နေမိတဲ့ သူတွေ ရှိနေသလို စိတ်ဓာတ် ခုခံအား ကောင်းစွာနဲ့ မလိုက်နာ မသင်ယူ မိသူတွေ ကလဲ ထိထိ ရောက်ရောက် မတားဆီး နိုင်ကြ သေးဘဲ ဆက်လက် ဖြစ်ပွားခွင့် ပေးထား ကြဆဲ ဖြစ်နေ ပါတယ်။ ဆက်လက် လက်သင့်ခံ ထားကြ ဦးမှာလား။ လူကြီး တို့ရဲ့ အနာဂတ်ဟာ ယနေ့ခေတ် လူငယ်တွေရဲ့ လက်ထဲ မှာ ရှိပါ တယ်တဲ့.. စကားပုံလေး ကြားဖူး ပါတယ်။ အိုမင်းမစွမ်း ဖြစ်လာတဲ့ အခါ ကိုယ့်ဘေးနားမှာ ဘယ်လိုလူ တွေနဲ့ ၀န်းရံ နေချင် ပါသလဲ။ ငါ့ကလေး မပါသေးလို့ ငါနဲ့ မဆိုင်ဘူးလို့ မျက်နှာလွဲ ခဲပစ် လုပ်ထား ကြဦး မှာလား…
ကလေးသူငယ်တွေ အပေါ်၊ တိုင်းသူ ပြည်သားတွေ အပေါ် ဒီလို လုပ်ရင် ဒီလို ဖြစ်နိုင်တယ် ဆိုတဲ့ အကျိုးဆက် ကို ဒီလူကြီးတွေ တကယ် မသိ ခဲ့ကြ ဘူးလား။ တကယ် မသိ ခဲ့ရိုး အမှန်ဆိုရင် ဒီလို တာဝန် ရှိသူ ဆိုတဲ့ နေရာ ကို ယူထားဖို့ ထိုက်တန် ပါ့မလား။ မထိုက်တန်ဘဲ ဇွတ်ယူ ထားခဲ့ရင်ရော တရား မျှတမှု ရှိပါ့မလား။ တကယ် သိလျက်နဲ့ သိသိနဲ့ တမင် လုပ်ခဲ့တာ ဆိုရင်ရော … ရာဇ၀တ်မှုမှာ မသိလို့ လုပ်မိသည် ဖြစ်စေ၊ သိသိနဲ့ လုပ်မိ သည် ဖြစ်စေ၊ ကျူးလွန် ပြီးရင် ရာဇ၀တ်မှု မြောက်ပြီးသားပါ။ တရား ဥပဒေ မှာလဲ နိုင်ငံ တစ်နိုင်ငံချင်း လိုက်နာ ရတဲ့ ဥပဒေနဲ့ တကမ္ဘာလုံးက နိုင်ငံ အားလုံး လိုက်နာ ရတဲ့ အပြည်ပြည် ဆိုင်ရာ တရား ဥပဒေ တို့အပြင် လောက သံသရာ ဇာတ်ခုံ ပေါ်မှာလဲ သဘာဝ တရားက ခုံရုံးပြု ၀ဋ်လည်စေတဲ့ တရား ဥပဒေ တို့ ရှိနေပါတယ်။ တရား စီရင်တဲ့ နေ့ကို ရောက်တဲ့ အခါ မှာတော့

အလှည့်ကျရင် မနွဲ့ကြ စတမ်း ပါပဲ။

သဗ္ဗေသတ္တာ - သတ္တ၀ါ မှန်သမျှ၊ ကမ္မသကာ - မိမိရဲ့ ကောင်းမှု မကောင်းမှု သည်သာလျှင် ကိုယ်ပိုင် ဥစ္စာ ရှိကြ ပါတကား…

2 comments:

chaos said...

အလှည့်ကျ မနွဲ့ကြစတမ်းပေါ့လို့ တစ်ခါတစ်ခါ တီးတိုးရေရွတ်မိရုံကလွဲလို့ ဘာမှမလုပ်နိုင်တဲ့ ကိုယ့်ကိုယ်ကို အပြစ်တွေတင်မိနေတယ်။

Anonymous said...

ဖတ်ရင်းနဲ့ ပြောမလို့ဟာ.. သူက ဦးသွားတယ်..
ကိုယ်တို့ မြေမှာ ဒီလို အဖြစ်မျိုးနဲ့ ကျန်ခဲ့ရတဲံ့ ကလေးပေါင်းများစွာ...
အားကစားသမားပေါင်းများစွာ...

ဒီလိုနဲ့.....
ကိုယ်တို့ တိုင်းပြည်မှာ......
လူညံ့တွေကြီးပဲ နေထိုင်နေတယ်ဆိုတာ...
ကမ္ဘာက သိသွားတာပေါ့...ကွယ်...။

အရည်အချင်းရှိသူတွေကို မရှိသူတွေနဲ့ အစားထိုး
သိပ်တော်နေသူတွေကို ချောင်ထိုးနေတဲ့
ကိုယ်တို့ တိုင်းပြည်မှာ..............
အနာဂတ်ဆိုတာ... ဘာလဲ.. မရေရာအတွေးနဲ့
ဘယ်တော့များမှ တူဘ၀ကို ရောက်ပါ့မလဲလို့ အတွေးပလုံစီရင်း ပြန်သွားပါတယ်

အခုရေးတာ ဘယ်သူလဲ .. မှန်းကြည့်...