ငါဟာ ပန်းတပွင့်မှန်း နင်သိလျက်
သန့်ရှင်း ဖြူစင် အေးမြဟန်နဲ့
လှပတဲ့ နှင်းပွင့်တွေကို
စေတနာ ဗလပွနဲ့
လာလာ ရွာချမပြနဲ့…
အဲသည့် နှင်းပွင့်တွေပါပဲ
ငါ့အမျိုးရဲ့ ပွင့်ဖတ် ပွင့်ချပ်တွေကို
ဖဲ့ယူ ကိုက်စား ပုပ်ဆွေး
အလှတရားတွေ ပျက်ဝေးစေဖူးတယ်
အကြောင်းသိတွေ လာမဖြားနဲ့
ငါက ရေခဲထဲမှာ ပွင့်တဲ့ပန်း …
သစ်ပင်စိုက်ခြင်းကို နားမလည်သူများကတော့ ပန်းကလေးတွေပေါ်ကို ရေပန်းမွှားမွှားလေးတွေ ဖြန်းပေးရင် ပန်းကလေးတွေ လန်းမယ်လို့ အကြမ်းဖျင်း ထင်တတ်ကြပါမှာ။ ရာသီဥတု ပူရင် ပန်းကလေးတွေ နွမ်းသွား တာ မြင်ဖူးကြတာမို့ အေးရင် ပန်းတော်တော်များများက ကြာရှည် လန်းနေတတ်တာကို မြင်ဖူးကြတာမို့ ပန်းကို ရေစိမ်ထားတတ်တာ၊ ရေမှာ အညှာကိုနှစ်ပြီး ထောင်ထားတတ်တာ မြင်ဖူးကြမှာပါ။ အေးတာချင်း အတူတူ နှင်းပွင့်လေးတွေ ပန်းပေါ်ကို ကျရင်ရော ဘာဖြစ်တတ်လဲ သိလား။ အေးရင်လန်းတယ်လို့ လှေနံ ဓားထစ် မှတ်တတ်သူတွေကတော့ လန်းမယ်လို့ ထင်မှာပါ။ ပန်းအတွက် သဘာဝကျကျ အမှန်တကယ် လိုအပ်တဲ့ အေးမြမှုဆိုတာထက် ပိုတဲ့အအေးဓာတ်ကြောင့် ပန်းပွင့်ဖတ်၊ ပွင့်ချပ်လေးတွေ ရိသွား၊ ပုပ်သွား၊ မြန်မြန် ပျက်စီးသွားတတ်ပါတယ်။ နှင်းရိုက်လို့ ပန်းနဲ့ သစ်သီးတွေ ပုပ်ကုန်တာကို တောင်ပေါ်သားတွေ သိကြမယ်ထင်ပါတယ်။
အဲလိုပါပဲ.. လူ့လောကမှာလဲ နောက်ဆက်တွဲ အကျိုးကို သိလျက်နဲ့ စေတနာ ရှိလေဟန်နဲ့ သဘာဝ မကျတဲ့ မမှန်ကန်တဲ့ စေတနာဆိုးတွေကို နှင်းတွေလို အေးမြတဲ့ စကားလုံးနဲ့ လုပ်ဇာတ်တွေ တဖွဲဖွဲ ကြဲချပြီး ကျေးဇူးရှင် နာမည်ယူပြီး သွယ်ဝိုက်တဲ့နည်းလမ်းနဲ့ သူတပါးရဲ့ ဘ၀တွေကို ဖျက်တတ်တဲ့ သူတွေ များလှပါတယ်။ တိမ်လို မာယာများပေမယ့် မိုးကောင်းကင်လို သဘောထား ကြီးချင်ယောင် ဆောင်ပြီး နှင်းပွင့်လို အေးမြ သန့်စင် ယောင် ဆောင်ထားတဲ့ ပန်းဖျက် လက်နက်တွေ ကြဲချပြီး ဖူးပွင့်နေတဲ့ ပန်းတွေရဲ့ ဘ၀တွေကို ဖျက်သီးတဲ့ ဒီလူတွေကို ကျွန်မ သိပ်မုန်းပါတယ်။
No comments:
Post a Comment